Blog adicado ao Jazz, Blues, Soul, Rock and Roll, etc..
xoves, 30 de xaneiro de 2014
O misterio de Tyrone Washington
Sempre é fascinante o
misterio que rodea aos músicos que, tras deixar unhas cantas
gravacións, desaparecen sen deixar rastro. Ven á cabeza o caso do
cantante e guitarrista Blind Blake, quen entre 1926 e 1932 gravou
varias ducias de Blues e Rags para o selo Paramount – hoxe
considerados paradigma do estilo Piedmont
– para logo simplemente esfumarse da historia.
Pero
a fin contas, estamos falando dos anos 20, cando os músicos entraban
no estudio, gravaban canto podían, cobraban e marchaban. Unha época
na un mesmo artista podía gravar baixo distintos pseudónimos para
distintos selos, sen que ninguén se preocupase en comprobar a súa
identidade.
Máis
estraña resulta unha “desaparición” dese estilo nos anos 70. Ese é o caso do saxo tenor Tyrone Washington. É obvio que
a influencia de Washington na historia da música non é nin
remotamente semellante á de Blind Blake, pero non deixa de ser
curioso que un músico tan interesante decidise borrarse do mapa
deixando a penas unhas poucas gravacións.
Non
é difícil trazar a carreira musical, polo menos a rexistrada en
disco, de Tyrone Washington. Debutou con Blue Note xunto a Horace
Silver no álbum Jody Grind,
de 1966. Tamén para Blue Note, participou na sesión de Contrasts,
de Larry Young (1967) e editou o
seu propio debut como líder, Natural Essence,
tamén de 1967. Xa fóra de Blue Note, colaborou no 69 con Stanley
Conwell. Horace Silver parece non ter boas palabras para el na súa
autobiografía. Aínda que lle recoñece o seu talento, considérao
un deses “angry avantgarde musicians of the late sixties”.
Nos
anos 70 Washington gravou un par de sesións como sideman e dous
discos máis como líder: Roots, do
73, para a independente Perception e Do Right, de
1974. En total, que se saiba, Tyrone Washington participou na
gravación de oito discos entre 1966 e 1976.
Despois
nada. Silencio. E por suposto, terreo para a especulación. Unha
posible solución ao misterio aparece en Amazon, na sección de
comentarios ao seu álbum Natural Essence.
Alguén que afirma ser o seu irmán di que Tyrone Washington, que
agora se chamaría Bialar Mohammed, deixou o negocio musical por
motivos relixiosos. Obviamente, non hai ningunha proba que confirme
esta versión. Wikipedia, citando ao crítico Jason Sositko,
refírese tamén aos motivos relixiosos como causa da retirada de
Washington. Pero a fonte deste parece ser, de novo, o famoso
comentario en Amazon. Se cadra algún día alguén atopa a Tyrone
Washington e o entrevista. Así saímos de dúbidas.
xoves, 23 de xaneiro de 2014
The Mighty Hannibal
The Mighty Hannibal non chegou a acadar o recoñecemento de grande
do Soul, pero a súa breve discografía ofrece todo tipo de sorpresas
agradables. O seu maior éxito logrouno en 1966, cunha canción sobre
a volta dos soldados de Vietnam, titulado Hymn No. 5, pero
este éxito non tivo continuidade. The Mighty Hannibal non volveu a
visitar as listas de Billboard até 1973, e en esta ocasión fíxoo
co que probablemente sexa o seu mellor tema, titulado The
Truth Shall Make You Free. Funk
intenso ao servizo dunha mensaxe de redención mediante a fe en Xesús. Un dos
mellores exemplos que se me ocorren do frutífero uso do Funk como
veículo para a mensaxe fervorosa do Gospel. Nunca mellor dito, a
marriage made in heaven.
En 2001, o selo Norton publicou un álbum recopilatorio titulado Hannibalism. Recomendable para... calquera.
The Mighty Hannibal, aínda que cego debido a un glaucoma, segue en activo e mesmo colaborando con bandas de Rock como os Black Lips.
venres, 17 de xaneiro de 2014
O camiño ao Rock and Roll
Preston Lauterbach, en The Chitlin' Circuit and
the Road to Rock and Roll (Norton,
2011) apunta unha sorprendente – e non demasiado
politicamente correcta – teoría: non só os plans de renovación
urbanística dos anos sesenta, senón tamén o movemento polos
dereitos civís e a integración racial, así como a loita contra a
corrupción política, sumaron esforzos para terminar coa florecente
vida urbana dos Downtowns
negros da primeira metade do século XX.
A obra de
Lauterbach transpórtanos a un mundo que xa non existe. Un mundo no
que nun bo número de cidades americanas podían atoparse zonas enteiras, xeralmente articuladas en torno a unha rúa principal, ou Stroll, onde a
poboación afroamericana vivía con relativa –
se ben precaria - autonomía respecto a poboación branca. Estes
Black Downtowns, tamén
coñecidos como Bronzevilles eran, de facto,
rexidos por poderosos “homes de negocios” negros cuxas fortunas
estaban cimentadas, entre outros comercios ilegais, no inmensamente
lucrativo negocio dos numbers,
a lotería ilegal omnipresente alí onde vivise un número significativo de afroamericanos.
O Stroll constituía un mundo político e económico semi-autónomo,
”paralegal”. O magnates negros que o dominaban mantiñan en torno a si redes
clientelares baseadas en favores persoais e apoio económico a igrexas e organizacións ao servizo do ascenso social dos negros. Isto
garantíalles non só poder político, senón tamén a consideración de Race Men,
beneficiadores da raza negra. A orixe máis ou menos escura dos seus
cartos pouco importaba nun mundo no que a fronteira entre negocios
lexítimos e o crime organizado resultaba borrosa, por non dicir
inexistente. Por suposto, a autonomía coa que funcionaba o Stroll obtíñase a cambio de
subornos a policía e autoridades brancas,
que a cambio facían a vista gorda cos negocios suxos de Bronzeville.
En moitas cidades chegaron a a celebrarse eleccións para escoller
Majors of Bronzeville.
Sen ningún poder oficial pero con moito real, estes “alcaldes”
exercían sen complexos de interlocutores coas autoridades oficiais, que non dubidaban en asistir ás súas “tomas de posesión”.
Demasiado poder político e económico detrás deles como para
ignoralos.
Convén, de todos
modos, non romantizar o Black Downtown.
Violencia, pobreza, vivendas insalubres constituían o pan de cada
día para os habitantes de sectores nos que, sen aparente contradición,
agromaban os negocios rexentados por negros e dirixidos a negros:
barberías, bares, cines, salas de xogos ou restaurantes ofrecían aos seus
clientes lugares onde gastar os cartos procedentes do aumento do emprego afroamericano resultante da expansión industrial xerada pola
segunda guerra mundial. Outro dos negocios estrela eran os salóns de
beleza, nos que as mulleres atopaban unha excelente alternativa
laboral fronte a servir de empregadas de fogar en casas de familias
brancas. E no centro da vida urbana do Stroll erixíanse eses auténticos
templos do entretemento que eran os nightclubs – lugares de
operacións dos “reis de Bronzeville”. Ao calor dos petos cheos e
as ansias de diversión florecía por suposto a música.
Estamos en
anos de transición. O mundo do swing e as big bands comezaba a resultar obsoleto. A depresión terminara con moitas big bands, e incluso para as que lograran sobrevivir, as
xiras eran demasiado caras. Era moito máis fácil gañar cartos con bandas pequenas que viaxasen barato.
Saxos e guitarras eléctricas podían substituír ás enormes seccións de
ventos por prezos moito máis alcanzables. Espelidos homes de
negocios como Denver D. Ferguson en Indianapolis, Clint Bradley en
Macon (Georgia) ou Don Robey en Houston embarcáronse na criación
dunha rede de clubes ao longo de cidades medianas e pequenas, sobre
todo no medio oeste e o sul, dotadas dunha florecente vida nocturna.
Ao longo desta rede, os artistas xiraban sen descanso, ofrecendo
actuacións de só unha noite, moitas veces acompañados de bandas
locais. Este circuíto foi coñecido desde o principio como Chitlin'
Circuit, e acabaría por se
converter na canteira de toda unha nova xeración de estrelas negras.
Ao calor do Chitlin' Circuit desenvolveríanse ademais as primeiras
emisoras de radio destinadas en exclusiva ao público negro, así
como selos discográficos propiedade dos mesmos promotores e donos
das salas que publicaban os discos das novas estrelas. Estes discos,
máis que para o mercado doméstico, estaban destinados ás jukeboxes,
medio ideal para promocionar as xiras dos artistas que eles mesmos
representaban. Clubes, DJ's, selos discográficos, ... todos
compartían intereses, todos gañaban co Chitlin' Circuit.
Unha gran revolución, pois, ten lugar na música afroamericana durante os primeiros cuarenta, e é a
substitución da big band polo combo pequeno. O gran protagonista, o
líder da revolución será Louis Jordan. Hoxe é difícil darse
conta da importancia de Louis Jordan, porque moitas das súas
innovacións simplemente as damos por supostas. O son sofisticado e
elegante que dominaba a música negra desde os anos trinta da paso ao
son downhome de Jordan
e os seus seguidores: Joe Liggins, Johnny Moore, Jack McVea, Ivory
Joe Hunter, ... foron as primeiras estrelas do Chitlin' Circuit. A
industria precisaba un novo nome comercial para este son, co obxecto
de substituír ao caduco race music e á vez distinguilo dun jazz cada vez máis minoritario. En 1949, Jerry Wexler, entón editor de Billboard, inventa o
termo Rythm and Blues, para referirse ao son das novas estrelas negras. Rythm and Blues
nunca pretendeu definir un estilo, senón simplemente nomear a musica popular ou comercial que no momento consumía o público
negro. Aquí basea Lauterbach outra das teses máis interesantes da
súa obra. O Rock and Roll
non foi criado por rockers brancos sureños a mediados dos cincuenta.
Baixo o paraugas da etiqueta Rythm and Blues,
o R'N'R naceu nos anos cuarenta, da man de Louis Jordan e demais
artistas negros. É difícil, por non dicir imposible, manter o
contrario segundo criterios estritamente musicais.
O Chitlin'
Circuit chegou con boa saúde aos anos cincuenta, e contemplou no
camiño o ascenso de artistas como Roy Brown, Wynonie Harris, T-Bone
Walker, Big Mama Thornton, B.B. King, Big Maybelle, Little Richard,
Johnny Ace, Ray Charles, James Brown,... todos eles e moitos máis
comezaron as súas carreiras xirando en concertos dunha noite por
salas de cidades pequenas e medianas do sur de estados unidos,
saltando dun Black Downtown
a outro, forxándose como artistas de directo. Ningún deles tería
chegado a nada sen a axuda dunha infraestrutura de clubes,
promotores, disc-jockeys e selos discográficos construída á sombra
da lotería ilegal, a extorsión, a corrupción política, o suborno
e, en fin, a ambición persoal duns cantos “homes de negocios”
visionarios.
Por motivos obvios, o inimigo
tradicional de Bronzeville
foran, desde sempre, os movementos rexeneradores que loitaban contra
a corrupción e o clientelismo político, e que polo tanto ameazaban
as bases mesmas sobre as que descansaban as súas estruturas de
poder. Pero a partir dos anos 60, foron os plans federais de
renovación urbanística os que finiquitaron de feito os Downtowns
negros e os seus negocios. Estes plans implicaban derrubes masivos de
edificios históricos, substituídos por high rises,
solares, autopistas,.... A destrución de Beale Street, en Memphis, é
paradigmática.
A integración racial supuxo, finalmente – como se avanzaba no primeiro parágrafo – o involuntario golpe de gracia. En realidade, o mundo segregado
anterior aos 60 convertía aos afroamericanos en clientela cativa dos
negocios “para negros”, sen importar a súa clase social,
preferencias ou poder adquisitivo. O Stroll podía
considerarse un espazo de liberdade, pero tamén desde logo unha
prisión para os seus habitantes. A medida que a integración abría novos horizontes, o mundo do vello Black
Downtown convertíase a ollos da
xeración dos dereitos civís nun vestixio do vello racismo, e a súa
sorte non debía ser distinta que a da segregación.